Стартаваў першы этап 35-й Міжнароднай сацыяльна-творчай праграмы «У будучыню – з надзеяй»

На працягу 35 гадоў у пацярпелых ад катастрофы на Чарнобыльскай АЭС раёнах Рэспублікі Беларусь, а таксама прыгранічных раёнах Расіі праходзіць міжнародная сацыяльна-творчая праграма «У будучыню – з надзеяй» (раней – «Чарнобыльскі шлях – дарога жыцця»).

Арганізатарамі праекта выступаюць Дэпартамент па ліквідацыі вынiкаў катастрофы на Чарнобыльскай АЭС МНС Рэспублікі Беларусь, Міністэрства культуры, Міністэрства адукацыі, ЦК ГА «БРСМ», Беларускі фонд міру.

Мастацкі кіраўнік праграмы – народны артыст Рэспублікі Беларусь Эдуард Ханок.

Мэта праграмы – падтрымка таленавітых дзяцей і падлеткаў, якія пражываюць на тэрыторыях, пацярпелых ад катастрофы на Чарнобыльскай АЭС. Творчая акцыя дае магчымасць для дзяцей выступіць на адной сцэне з вядомымі артыстамі, музыкантамі і выканаўцамі, паказаць свой талент і адчуць сваю значнасць.

Сёлета ў праграме прымае ўдзел Заслужаны калектыў Рэспублікі Беларусь фальклорны ансамбль «Купалінка», артысты Філармоніі для дзяцей і юнацтва пры Белдзяржфілармоніі (лаўрэаты міжнародных конкурсаў), артысты беларускай эстрады, творчая моладзь, таленавітыя дзеці і падлеткі з пацярпелых ад чарнобыльскай катастрофы раёнаў. Лепшыя юныя артысты будуць запрошаныя на фінальны форум, які пройдзе ў Мінску ў кастрычніку бягучага года.

1 красавіка канцэртная праграма і майстар-клас прайшлі ў Мазырскім раёне, 2 красавіка – у Брагінскім і Хойніцкім раёнах, 3 і 4 красавіка – у Лельчыцкім, Нараўлянскім, Жлобінскім і Калінкавіцкім раёнах Гомельскай вобласці.

Творчая акцыя арганізуецца ў адпаведнасці з мерапрыемствамі па інфармацыйным забеспячэнні ў рамках Дзяржаўнай праграмы па пераадоленні наступстваў катастрофы на Чарнобыльскай АЭС на 2021–2025 гады.